分頁: 6/81 第一頁 上頁 1 2 3 4 5 6 7 8 9 10 下頁 最後頁 [ 顯示模式: 摘要 | 清單 ]
昨晚聽歌, 見到有首 JUNO + KAY “羅生門” 按黎聽下先
我其實無話好鐘意 JUNO, 但佢 D 歌又永遠都會按黎聽下
覺得幾特別的, 都幾好聽的

"羅生門"
第一感覺 “好聽” , 連續聽了三次
第二感覺 “似曾相識” , 但唔記得係咩, 好熟
第三感覺 “好慘", 好似大巴大巴車落去個男仔到

今日 FB 好多人瘋傳, 原來呢首歌係 第三步曲~女主角的回應
第一步曲 {耿耿於懷}~講男主角好鐘意個女主角
第二步曲 {念念不忘}~講男主角十年後依然重鐘意女主角
第三步曲 {羅生門}~講女主角回應啦, 我….其實無鐘意過及已放底你....係你..自 作 多 情

cry9

其實第一及二步曲都係好好聽的, song list入面一定有
當初只知 {念念不忘}是{耿耿於懷}的下集, 真係無諗過會再出<回應版> 羅生門
1

傳聞會有第四步曲, {雷克雅未克} 是回覆番第三步曲的最尾, 男主角想同女主角在冰島團聚…
好期待呀…..
我比較變態, 希望首歌係繼續慘落去, 不要說女主角去冰島找男主角大團圓呀

真係未試過期待一首歌
我亦好鐘意 WYMAN+JUNO的心思, 令歌真的變成一個故事.
我今日同老公第一次去 "女人天堂, 男人地獄" 的地方
咩叫 "女人天堂, 男人地獄"
我只知係一個商場,
叫 "葵涌廣場"

今日去到
原來個商場係好多小舖頭 ,不是連鎖店
重有好多食名, 小食主食都有的
唯一的連鎖店, 應該係 "吉野家"

商場有 4 層 , 主要係賣女裝
由頭到腳的服式都有
售價都唔貴, 款式就見人見智啦,
日韓淘淘貨都有

我地一去到就去食野先
因為好肚餓呀, 我食米線, 老公食酸菜牛腩飯. 之後就開始行街街啦

商場.. 唔知係咪好大, 總係行極都行唔完睇唔完咁
條條巷都好似無行過, 我地已經唔知間間店都入
四層的商場, 我地都大約行左 三個鐘左右

之後就過對面的 新都會, 因為要去廁所

新都會唔講啦, 雖然都係第一次去, 但主要係連鎖店, 總有一間係左近啦

去完廁所, 我地就去坐地鐵過荃灣
行新之城, 原來而家新之城唔同以前架啦
行過女人天堂, 發覺新之城 d 野貴 d
當然都比我家附近平啦
所以無收鑊
我地其實都攰
所以就行去大河道附近食野
又想食韓燒, 又想食泰菜
泰菜當然係 金仿啦
兩間都取票等啦
最後都決定泰菜啦
大約15分鐘 金仿就有位了

食飽後, 我地就去坐巴士回家

講番 今日的收鑊先
我地買了一件衫, 一張 sd16gb咭, 一對襪, 一個髮圈,
在荃灣就買左個 lego人 jelly 模
無啦, 唔算好多野, 但總有 d 收鑊
已很滿足了

我唔知標題應該寫乜 Beef Wellington? Bread Street Kitchen? Yummy? Dinner?
諗唔到, 以我寫了 " 太好味 "

好味得有點過份, 食飽後, 我話過我呢世都不會出街亂叫 Beef Wellington食

事源係:
上星期四, 老公見到雜誌介紹 Bread Street Kitchen & Bar做緊 Beef Wellington只限定一星期, 我地好想去食的原因係, 1) Beef Wellington係我地想食好耐, 2) 係地獄廚神的拿手好菜, 3)是我狠左好耐想去的餐廳, 不過得一星期限定, 我都打定輸數未必有得食

咁我星期五一早就上網睇啦, openrice, 呀~有得online book , 不過星期六日一 full book….咁星期二要返學, 試星期三, 幸福+幸運地, 夜晚 7:30後有位, 我地放六點, 再出去起碼訂 8:00 安全d, 咁我就拿拿淋訂枱 req. Beef Wellington, 不過我都唔放心, 下午再打電話re-cfm, 因為我怕無 Beef Wellington食,好彩, 係成功訂的.  重得知一份係 for2 人食的份量,

我地由星期一開始就好期待, 我成日諗, $998/2人夠竟有d咩食, 在星期一, 我在openrice見到有人放了相片上去, 嘩, 好吸引呀, 雖然我唔知人地係兩人食定幾個人食, 但只感覺, 食完都唔可能食其他野, 不過唔怕啦, 點都要食一次

終於都星期三啦, 我地放工約好在新港城坐681去中環, 之後行過去, 地址係蘭桂芳酒店, 我地昨晚重問定點去, 妖, 原來有兩間蘭桂芳酒店的, 我地兩個白痴行了去九如坊果間蘭桂坊酒店, 好彩重有時間, 我地睇住google map 去真係係蘭桂芳的蘭桂芳酒店, 好彩無遲,
好驚遲到賣枱

入到去, 都係英倫工業風的裝修, 好靚, 不過冷氣唔夠
原來wellington可以選2個side dish 的, 我地緊係要薯條啦hand cut chips, 重有mushroom, 一路坐一路四圍望人地的食物, 見到人地食fish n chips 又好想食, 但知道一定無可能, 嗯~下次
我地的wellington到啦, 兩份side dish份旺不多小小的, 但已足夠, 再每人兩件好大件的Beef Wellington, 睇樣都覺得好豐富,好滿足呀

都係相機食先~
之後忍唔住食了手切薯條, 好甜, 好熱, 好味, 蘑菇, 炒得好香, 到主角啦
我食先~老公睇相中, 我切了一小件放入口,我爆一句, {好好食呀 真係好好食架} , 對雙眼發光; 老公見到我個樣都頂我唔順, 哈~
我叫老公食比我睇, 佢重衰, 爆句 {好能好食}, 都係一樣眼發光的
大家唔出聲各自食了一人一件, 其實都好 “流” , 真係要食下蘑菇中和下, 我地另一件大家都係食左一半, 真係食唔到, 我有想過拎走, 但我地無焗爐, 回去叮=浪費, 不如食到幾多得幾多重好啦, 食到食唔到, 我地休息左陣, 老公去食煙, 回來時佢話想食都係限定的甜品, 因menu無, 我走出去睇, 係溫布頓網球賽限定甜品 , 好啦, 就叫一個share~, 其實諗番……. 點解我地會食得落呢, 女人真係有兩個胃架?

甜品好快到了, 又係食相機食先~
又係爆了句 {好好味喎}不過今次無眼發光

今餐食了四樣野~2個side dish, 一個主菜Beef Wellington, 一個甜品
所有野都好好好好食, 我地未食完已係到討論, 下次要食乜, 唔知會做乜promotion, 所以我地兩個都好滿足今餐, 希望出年可以再食Beef Wellington

連甜品, 我地食左 $1100左右, 我地覺得唔貴的
見menu 其他的食物都唔貴, 主菜就$150-250, 其他side dish, 小食, 都係 $88-180 咁上下, 係完全接受的價錢

呢餐, 真係好鬼滿足

等我形容下Beef Wellington點解食落口要爆句野重要發光啦~:
酥皮好鬆, ham夠咸味, 磨菇肝醬都係好帶咸和好香 牛柳~有肉味, 有肉汁, 四成熟, 好軟熟, 成件事好完美好夾, 不過~其實咸左小小的, 但~只要你有加小小另上的肉汁就完全夾番晒, 因為個汁是牛柳的肉汁再加了蜜糖, 中和番, 唔咸, 重無咁 “流”添

再形容下個甜品,
甜品, 好似芭菲杯咁, 好多士多啤梨, 好多cream, 有士多啤梨醬淋係cream上面
我倆都係一個唔鐘意食士多啤梨的人, 亦唔算好鐘意食甜品, 但都要爆句野呢
原來係好有心絲的,
cream 好厚好滑似奶油, 但不甜的, 可以話無味, 但只有香味
士多啤梨和醬都是新鮮的, 醬也不太甜
原來下面重有好多蛋白糖霜糖糖, 不太甜, 好脆口
當cream是不甜加上新鮮的士多啤梨和醬, 就變成甜味剛剛好, 再加上糖糖, 脆口, 有野咬下, 成件事就變成好完美了
周打魚湯 (特別懶人版)

嗯… 就左煮呢個湯, 我睇左好多名廚教學, 再改良左少少, 變了懶人版…呀…
老公問我, 點解無呢個食譜, 無咩, 只係我懶啫~

材料
新鮮魚肉, 我在百佳買了一份龍躉肉, 用鹽醃十分鐘
煙肉一包, 切碎
洋蔥一個, 切碎
西芹兩片, 切粒
甘荀一條, 切粒
薯仔一個, 切粒
蒜頭兩粒, 切碎
粟米粒
蔬菜魚湯 一盒
Cream, 一盒
鹽, 胡椒

做法:
1)  用大煲, 炒香煙肉
2)  繼續, 炒洋蒽, 炒至軟和嗅到香後
3)  (唔夠油, 可加牛油) 再落蒜蓉, 薯仔, 西芹, 甘荀一齊再炒香
4)  加入蔬菜魚湯和半杯水, 中途不停攪下, 怕痴底
5)  滾後, 轉細火煲多半小時 (最緊要薯仔和甘荀淋了就ok)
6)  最後加入魚肉, 粟米粒和胡椒, 轉回大/中火
7)  待再滾起, 轉細火, 加cream, 攪混和滾起就食得啦
食時, 加入梳打餅, 超完美呀~

呢個湯~其實好飽肚, 真係飲湯都飽飽~
呢個野, 其實… 我想整好耐好耐了, 但可惜一直都買唔到 個餅
今日, 我終於係大百佳找到, 好開心, 立即買

wrap x 3pcs
雞柳 x 6pcs
半個 lemon
紅洋蔥 x 1pc (一定要有, 切絲)
蕃茄 x 1pc  (可有可無, 有就切片)
本來想買靚生菜, 但買唔到, 再用了翠肉瓜 (我覺得有, 起碼有d菜類食下, 削片)

首先, 醃雞柳, 用 lemon 汁, 香草胡椒 , 醃半小時就夠
之後, 煎香

削了片的翠肉瓜炒軟身
紅洋蔥加小小糖一齊炒, 都係炒軟身,

wrap 餅用平底鑊煎熱, 小小燶邊就可以
煎好的wrap餅 上面放上翠肉瓜 紅洋蔥, 再加上雞柳和蕃茄片, 卷成一卷就可以食了
um… 我覺得加小小茄汁好味d~
分頁: 6/81 第一頁 上頁 1 2 3 4 5 6 7 8 9 10 下頁 最後頁 [ 顯示模式: 摘要 | 清單 ]